Vestland fylkesting: En interpellasjon frå Raudt om livssynsbasert tilsetjing av helsesjukepleiarar ved friskular møtte sterk motstand frå KrF. Partiet meiner kritikken bommar på både prinsipp og rolleforståing – og løftar i staden fram Danielsen-skulen som eit godt døme på ansvarstaking.
– Burde bli rosa, ikkje problematisert
KrF-representant Jon Olav Økland var tydeleg i debatten: Interpellasjonen frå Raudt går for langt.
Han peika på at Danielsen vidaregåande skule sjølv vel å finansiere ei helsesjukepleiarstilling – ei oppgåve som eigentleg ligg til kommunen.
– Dette er ein skule som tek eit ekstra ansvar for elevane sine. Då bør vi rose det, ikkje problematisere det, sa Økland.
Bakgrunnen for saka er at skulen i utlysingsteksten opnar for at søkjarens kristne livssyn kan bli tillagt vekt i tilsetjinga.
Forsvarer retten til å stille verdikrav
KrF meiner det er både legitimt og naturleg at friskular legg vekt på eige verdigrunnlag ved tilsetjingar.
– Friskular er etablert nettopp for å vere eit alternativ til det offentlege. Då er det avgjerande at dei som blir tilsett, også kan stå inne for verdiane skulen byggjer på, sa Økland.
Han samanlikna med andre samanhengar der lojalitet til verdigrunnlaget er avgjerande:
– Det ville vore heilt naturleg at ei kyrkje tilset ein prest som deler trusgrunnlaget. Slik er det også for friskular.
Avviser mistillit til helsepersonell
KrF reagerer særleg på det dei oppfattar som ei generell mistillit til helsepersonell.
Interpellasjonen frå Raudt løftar fram eit mogleg dilemma der lojalitet til skulen sitt livssyn kan kome i konflikt med profesjonsetikken til helsesjukepleiaren.
Dette avviser KrF:
– Det finst mange helsearbeidarar med personlege verdiar, også i det offentlege helsevesenet. Det betyr ikkje at dei ikkje er profesjonelle, sa Økland.
Partiet meiner det er grunn til å ha tillit til at autorisert helsepersonell følgjer regelverk og etiske standardar, uavhengig av arbeidsplass.
Dette samsvarer også med vurderinga frå fylkesordføraren, som peikar på at helsepersonell er bunde av profesjonsfaglege og etiske plikter – uavhengig av livssyn.
Elevane veit kva dei vel
KrF understrekar at elevar som vel ein friskule, også vel eit verdigrunnlag.
– Elevane som går på Danielsen, er klar over kva skulen står for. Samtidig skal alle bli møtt med respekt og profesjonalitet, uansett legning og identitet, sa Økland.
Partiet meiner difor at problemstillinga som blir reist, er både teoretisk og overdriven.
Vil avvise interpellasjonen
På bakgrunn av dette varsla KrF at dei vil stemme mot realitetsbehandling av interpellasjonen.
Grunngivinga er todelt:
- Innhaldet blir oppfatta som feilslått og prinsipielt problematisk
- Saka ligg utanfor fylkeskommunen sitt ansvar
Fylkesordføraren peikar på at det er kommunen som har det lovpålagde ansvaret for skulehelsetenesta.
KrF: – Viktig å verne om mangfaldet
Avslutningsvis løfta KrF eit breiare prinsipp: retten til reelt mangfald i skulesektoren.
– Skal vi ha eit mangfald av skular, må vi også akseptere at dei har ulike verdigrunnlag. Det er ein del av religionsfridomen og samfunnsmodellen vår, sa Økland.
For KrF handlar saka difor ikkje berre om ei konkret tilsetjing – men om rammevilkåra for friskular i Noreg.